《The Sinking City》
記得喺9月頭，有日晏晝，我忙到甩晒轆嘅時候，出版社個90後索妹妹Whatsapp我，問我「有無興趣去睇《西謊極落：太爆‧太子‧太空艙》首映？」
啊？呢套咪就係殿堂級·高登大文豪·向西村上春樹嘅小說改編電影？！
我第一個反應係「堅 決 拒 絕 」！
(題外話：其實出版社所有妹妹目測都係90後，我極度懷疑個老闆係鍾情呢個age group，所以當初第一次見面，必須確認咗我係90後先繼續傾落去，anyways~)
作為一個貪小便宜嘅港女，我深明真正對作者嘅支持係要科水入戲院睇！自己一個睇係唔夠嘅，仲要拖埋個friend落水一齊睇！於是，喺坐滿一班麻甩仔(佬?)嘅戲院入面，我哋兩條女顯得特別出眾。
由於睇咗小說《西謊極落》先入場，所以對劇情都有一定嘅掌握。唯一感到意外嘅係我最鍾意嗰篇「作家的謊言」套戲刪減咗，所以建議大家除咗睇戲，一定要買本小說睇！
劇透嘅嘢，我係唔會做嘅！(其實係懶得寫) 但我好肯定咁講，有時現實比電影更荒謬，香港的而且確係有班住緊太空艙嘅人！嚟緊仲有貨櫃屋！所以，當全戲院嘅人喺度喪笑，當我個friend話「好耐無試過睇套咁好笑嘅港產片！」時，我笑唔出，因為套戲嘅訊息係相當沉重。
所以如果你話呢套係喜劇，我唔認同，呢套其實係香港社會紀錄片。都係嗰句，「你在想甚麼，就看到甚麼！」唔知你又睇到啲咩？
Search